Что обозначают главные государственные символы Республики Беларусь?

Звонкі май багаты на патрыятычныя святы. Так, у другую яго нядзелю, 13 мая, грамадзяне нашай краіны адзначаць Дзень Дзяржаўнага герба і Дзяржаўнага флага Рэспублікі Беларусь.

Тры асноўныя сімвалы нашай дзяржавы – гэта флаг, герб і гімн. Як усім нам вядома, раней беларуская сімволіка была іншая, зараз мы карыстаемся абноўленым варыянтам.

Па ініцыятыве кіраўніка дзяржавы 14 мая 1995 года ў рэспубліцы адбыўся першы ў яе гісторыі рэферэндум. Адным з пытанняў, што выносіліся на абмеркаванне, было наступнае: «Ці падтрымліваеце Вы прапанову аб увядзенні новага Дзяржаўнага флага і Дзяржаўнага герба Рэспублікі Беларусь?»

Станоўчы адказ на гэтую прапанову далі 75,1 працэнтаў грамадзян, што прынялі ўдзел у рэферэндуме. Па выніках рэферэндуму Прэзідэнт Беларусі 7 чэрвеня 1995 года падпісаў два ўказы: № 213 «Аб зацвярджэнні эталона Дзяржаўнага герба Рэспублікі Беларусь і Палажэння аб Дзяржаўным гербе Рэспублікі Беларусь» і № 214 — «Аб зацвярджэнні Палажэння аб Дзяржаўным флагу Рэспублікі Беларусь». Так у Беларусі з’явіліся новыя Дзяржаўны герб і Дзяржаўны флаг, якія дзейнічаюць і сёння.

Што ўяўляе сабой беларуская сімволіка, ведае кожны грамадзянін нашай краіны. Як тлумачыцца яе значэнне, мы коратка раскажам.

Дзяржаўны флаг Рэспублікі Беларусь мае выгляд прамавугольнага палотнішча, якое, у сваю чаргу, складаецца з двух гарызантальных палос: верхняй — чырвонага колеру і ніжняй — зялёнага. Стаўленне шырыні палос чырвонага і зялёнага колеру — 2:1. Стаўленне шырыні Дзяржаўнага флаг Рэспублікі Беларусь да яго даўжыні — 1:2. Каля тронка (дрэўка) вертыкальна размешчаны беларускі нацыянальны арнамент чырвонага колеру на белым полі, якое складае 1/9 даўжыні Дзяржаўнага флага Рэспублікі Беларусь.

Чырвоны колер флага тлумачыцца гісторыяй: гэта колер пераможных штандартаў грунвальдскай перамогі беларускіх палкоў над крыжакамі, колер сцягоў дывізій Чырвонай Арміі і беларускіх партызанскіх брыгад, якія вызвалялі Радзіму ад фашысцкіх акупантаў і іх прыслужнікаў. Зялёны колер — гэта колер надзеі, вясны і адраджэння, колер лясоў і палёў, якімі так славіцца наш родны кут, якія неаднойчы апявалі ў сваіх творах славутыя паэты беларускай зямлі. Беларускі арнамент сімвалізуе культурную спадчыну народа, духоўнае багацце нацыі, адзінства яе песняроў і творцаў з народам.

Што датычыцца герба, то ён мае багатую гісторыю і неаднойчы змяняў свой знешні выгляд: “Пагоня” з вершнікам на кані, потым серп з молатам з надпісам “Пралетырыі ўсіх краін, яднайцеся!» на дзвюх дзяржаўных мовах, і нарэшце – абрыс роднай краіны ў сонечных праменях. Сёння Дзяржаўны герб Рэспублікі Беларусь мае наступны выгляд: зялёны контур краіны ў залатых промнях сонца над зямным шарам. Зверху контуру знаходзіцца пяціканцовая чырвоная зорка. Сам герб абрамляе вянок з залатых каласоў, пераплеценых справа кветкамі канюшыны, злева — ільну. Каласы абвіты чырвона-зялёнай стужкай, на якой знізу зроблены надпіс золатам: «Рэспубліка Беларусь».

Герб, флаг і гімн – яны як пашпартныя даныя нашай Радзімы, а значыць, іх гісторыя – гэты гісторыя Беларусі – наша з вамі! Нездарма ў гэты святочны дзень на флагштоку на Кастрычніцкай плошчы сталіцы падымаюць Дзяржаўны флаг Рэспублікі Беларусь. На цырымоніі прысутнічаюць ветэраны, моладзь, прадстаўнікі грамадскіх аб’яднанняў, працоўных калектываў сталіцы. Аналагічныя мерапрыемствы праходзяць і ў іншых гарадах рэспублікі.

Падрыхтавала Ганна КАЦІКАВА
Фота з архіва РК ГА «БРСМ», а таксама сайтаў belta.by і belarus.by