На областном семинаре в Дубровенские районе опробовали новые технологии в сельском хозяйстве
Галоўнае – якасць і аператыўнасць
29 мая ў нашым раёне адбыўся абласны семінар-нарада, на якім былі комплексна абмеркаваны тэхналагічныя, тэхнічныя і арганізацыйныя пытанні правядзення нарыхтоўкі кармоў, закладкі шматгадовых культурных пашаў, будаўніцтва і рэканструкцыі ферм, пашавага ўтрымання жывёлы і падрыхтоўкі да жніва.
На семінар былі запрошаны начальнікі райсельгасупраўленняў з усіх раёнаў вобласці, іх намеснікі па жывёлагадоўлі і раслінаводству, галоўныя ветурачы райветстанцый, адказныя работнікі апарата абласнога камітэта па сельскай гаспадарцы і харчаванню і абласных службаў АПК. Кіраваў семінар-нарадай старшыня аблсельгасхарчу Сяргей Аляксандравіч Догель. У рабоце семінара прыняў удзел старшыня райвыканкама Анатоль Іванавіч Лукашоў.
Адкрываючы нараду С.А.Догель падкрэсліў, што галоўная мэта семінара — завастрыць увагу кіраўнікоў і спецыялістаў раённых службаў аграпрама на неабходнасці неадкладна прыступіць да ўборкі траў першым укосам. Аб гэтым гаварылі на пленарным пасяджэнні, а потым непасрэдна на аб’ектах семінара першы намеснік старшыні аблсельгасхарчу Уладзімір Аляксандравіч Машэра, дырэктар РУП “Віцебскі занальны інстытут сельскай гаспадаркі НАН Беларусі” Сяргей Рыгоравіч Якоўчык, начальнік аддзела ветэрынарыі і дзяржаўнай ветэрынарнай інспекцыі аблсельгасхарчу Аляксандр Міхайлавіч Козак.
—Высокая якасць нарыхтаваных кармоў — гэта самы галоўны фактар атрымання запланаваных аб’ёмаў жывёлагадоўчай прадукцыі. А якасць кармоў перш за ўсё залежыць ад тэрмінаў ўборкі траў, — падкрэсліў у сваім выступленні першы намеснік старшыні аблсельгасхарчу У.А.Машэра. — Аптымальная фаза ўборкі злакавых траў — канец трубкавання-пачатак калашэння, бабовых — пачатак бутанізацыі.
У.А.Машэра на пленарным пасяджэнні, а дырэктар Віцебскага занальнага інстытута сельскай гаспадаркі НАН Беларусі С.Р.Якоўчык, непасрэдна на сенажаці КУСГП “Першамайскае” на канкрэтных лічбах і фактах паказалі ўдзельнікам семінара да чаго прыводзіць спазненне з уборкай траў.
Мінулая зімоўка ў гэтым плане павінна стаць урокам на будучае. Аб гэтым гаварыў начальнік ветаддзела аблсельгасхарчу А.М.Козак. У Віцебскай вобласці, у тым ліку і ў нашым раёне, у мінулым годзе была назапашана рэкордная колькасць сенажу і кукурузнага сіласу. Але замест чакаемай істотнай прыбаўкі прадукцыі ў многіх гаспадарках атрымалі “мінус” па надоях.
Не можа не турбаваць і той факт, што няма чакаемай прыбаўкі надояў і пасля выгану статкаў на пашу.
—Надоі ў пачатку гэтага пашавага перыяду прырастаюць намнога ніжэйшымі тэмпамі, чым калісьці пасля галодных зімовак, — падкрэсліў А.М.Козак.
Таму сёння, па словах дырэктара Віцебскага занальнага інстытута сельскай гаспадаркі С.Р.Якоўчыка, выйсце с сітуацыі адно: неабходна вырошчваць травы з розным перыядам іх паспявання, тады праблем з уборкай у аптымальныя тэрміны будзе менш.
Каля палавіны пажыўнай якасці кармоў губляецца ў час іх нарыхтоўкі і захоўвання. Як пазбегнуць гэтага ішла канкрэтная, дзелавая размова на семінары.
Адзін з перспектыўных шляхоў вырашэння гэтай праблемы — укараненне ў вытворчасць тэхналогіі нарыхтоўкі травяністай масы ў рулоны з абмоткай стрэйч-плёнкай. Такі метад нарыхтоўкі корму быў прадэманстраваны на сенажаці КУСГП “Першамайскае”.
А наогул, у гэтым годзе, па словах першага намесніка старшыні аблсельгасхарчу У.А.Машэра, у Віцебскай вобласці неабходна нарыхтаваць 58 тысяч тон такога корму.
Таксама на базе КУСГП “Першамайскае” удзельнікі семінара пазнаёміліся з тэхналогіяй закладкі шматгадовых культурных пашаў.
Мадэрнізацыя ферм
Другая важнейшая праблема, якая абмяркоўвалася на семінары — рэканструкцыя старых ферм. Як ва ўмовах Дубровеншчыны праводзіцца мадэрнізацыя ферм, на семінары было прадэманстравана на прыкладзе ААТ “Прыдубровенскае”.
На ферме аддзялення “Ніва” КУСГП “Першамайскае” удзельнікі семінара пазнаёміліся з ходам будаўніцтва лёгкага тэнтавага памяшкання для ўтрымання маладняку буйной рагатай жывёлы.
На базе ААТ “Праўда-С” і “Герой” удзельнікі семінара пазнаёміліся з арганізацыяй пашавага ўтрымання жывёлы і ўзнаўлення статка.
Рыхтуемся да жніва
На семінары абмяркоўваліся праблемы падрыхтоўкі да ўборкі ўраджаю.
Адным з самых вузкіх месцаў на жніве з’яўляецца дапрацоўка збожжа. Такая праблема характэрна для ўсіх раёнаў вобласці, у тым ліку і нашага.
Сёлета на Дубровеншчыне ўзводзіцца шэсць новых збожжасушыльных комплексаў. У трох гаспадарках — ААТ «Прыдубровенскае», КУСГП «Першамайскае» і імя Чарняхоўскага прыступілі ўжо да мантажу абсталявання. Як ідуць работы па ўзвядзенню новай сушылкі ўдзельнікі семінара мелі магчымасць пазнаёміцца ў ААТ «Прыдубровенскае». Чакаецца, што будаўніцтва збожжасушылак будзе завершана да пачатку жніва.
Андрэй КВІР
Фота аўтара