130-летие Янки Купалы отметили под Минском праздником поэзии, песни и народных ремесел
З зямлёй і небам звязывае мяне ніць –
Неразарваная векавечна павуціна:
Зямля мяне галубіць, як вернага сына,
А сонца мне душу не кідае туліць,
Яшчэ ў калысцы я наўчыўся з песень сніць
Аб гэтых блізкіх мне, а цесных так мясцінах:
Што роднай нівы я мільённая часьціна,
Што зоркі роднай у сэрцы мне іскрынка тліць…
Гэтыя вершаваныя радкі — споведзь у любові да мілай сэрцу Бацькаўшчыне належаць класіку сусветнай і беларускай літаратуры, паэту, драматургу, публіцысту, а таксама перакладчыку і грамадскаму дзеячу XX стагоддзя Янку Купалу.
Як вядома, нарадзіўся Іван Дамінікавіч Луцэвіч (сапраўднае імя паэта) 7 ліпеня 1882 года (па новым стылі) у фальварку Вязынка пад Менскам (цяпер вёска Вязынка Маладзечанскага раёна Мінскай вобласці). А таму на працягу вось ужо 40 гадоў менавіта тут, на малой радзіме паэта, кожны ліпень збіраюцца ўсе тыя, хто з павагай і любоўю ставіцца да асобы і творчасці класіка.
Багатым на разнастайныя цікавыя мерапрыемствы выдалалася 7 ліпеня і сёлета. Так, у гэты дзень для гасцей свята паэзіі, песні і народных рамёстваў «З адною думкаю аб шчасці Беларусі» у Купалаўскім мемарыяльным запаведніке «Вязынка» прагучала канцэртная праграма «Малюся я небу, зямлі і прастору…», у якой удзельнічалі Нацыянальны акадэмічны народны хор імя Г.І. Цітовіча, артысты Нацыянальнага акадэмічнага тэатра імя Янкі Купалы і Рэспубліканскага тэатра беларускай драматургіі, а таксама фольк-медыя группа «Неруш» (УА «Беларускі дзяржаўны ўніверсітэт»), фальклорныя ансамблі «Грамніцы» і «Талака» (УА «Беларускі дзяржаўны ўніверсітэт культуры і мастацтваў») і Беларускі дзяржаўны ансамбль народнай музыкі «Свята».
На другой канцэртнай пляцоўцы паклоннікаў творчасці беларускага паэта ў гэты дзень чакала літаратурна-музычная праграма «Адгукніся, душа!..». Акрамя таго, тут праходзілі грамадска-культурная акцыя «Чытаем Купалу разам» і выступленне фіналістаў конкурса аўтарскай песні «Купалаўскія вакацыі». Многа яскравых уражанняў гасцям свята падарылі і аматарскія фальклорныя калектывы Мінска і Маладзечанскага раёна.
Разам з тым, усе прысутныя ў гэты дзень маглі наведаць экспазіцыі мемарыяльнага запаведніка «Вязынка» і паўдзельнічаць ў майстар-класах па ткацтву, вышыванню, бісерапляценню, кавальскай справе, вырабу лялек-ахоўніц і рэчаў з шэрсці на кірмашы народных рамёстваў.
А напярэднанні святкавання 130-годдзя з дня нараджэння беларускага паэта ў Мінску прайшла ўрачыстая цырымонія ўскладання кветак да помніка Я. Купалы, на якой прагучалі творы беларускага класіка «Песня мая» і «Спадчына» ў выкананні Дзяржаўнага камернага хора Беларусі. Таксама вядомыя творы паэта ў гэты дзень дэкламіравалі пераможцы конкурса чытальнікаў «З Купалам у сэрцы».
Вось такімі святочнымі для многіх жыхароў нашай краіны выдаліся першыя выхадныя дні ліпеня. Акрамя таго, дзень нараджэння беларускага песняра традыцыйна адзначаюць у Чэхіі, Польшчы, Прыбалтыцы і іншых краінах свету, дзе таксама шануюць і паважаюць нашага земляка.
Падрыхтавала Вікторыя АЛЯКСАНДРАВА
Крыніца фота: www.belta.by