Земледельцы Дубровенщины подводят итоги сельскохозяйственного года

Не колькасцю,а ўменнем
Наш карэспандэнт сустрэўся з першым намеснікам старшыні райвыканкама, начальнікам упраўлення сельскай гаспадаркі і харчавання Алегам Міхайлавічам ЛЫНДЗІНЫМ і ўзяў у яго інтэрв’ю.
—Алег Міхайлавіч, раскажыце, калі ласка, якімі працоўнымі дасягненнямі сустракаюць сваё прафесійнае свята сельскія працаўнікі?

—Аналіз работы за дзесяць месяцаў гэтага года сведчыць, што аграпрамысловы комплекс нашага раёна ў цэлым сёлета развіваецца дынамічна, у большасці галін сельгасвытворчасці ёсць прыбаўка прадукцыі ў параўнанні з узроўнем мінулага года, павысілася эканамічная эфектыўнасць гаспадарання. Валавой прадукцыі ў жывёлагадоўлі атрымана на 95 мільярдаў рублёў, што на 4,2 працэнта больш, чым за аналагічны перыяд мінулага года. Вытворчасць жывёлы сёлета склала 6308 тон і павялічылася на 4,5 працэнта, а яе рэалізацыя — на 7 працэнтаў, у тым ліку буйной рагатай жывёлы — на 17 працэнтаў. Валавы надой малака склаў 29634 тоны, што на 4 працэнты больш, чым у мінулым годзе. Надой малака на карову вырас на 129 кілаграмаў. На 2 працэнты прыбавілася пагалоўе буйной рагатай жывёлы на фермах раёна.
І што вельмі важна, усе гаспадаркі ў галіне жывёлагадоўлі працуюць рэнтабельна. Так, рэнтабельнасць малака сёлета дасягнула 17 працэнтаў, а мяса — 12 працэнтаў. Заўважу, што на рэнтабельную работу ў мясной галіне гаспадаркі раёна выйшлі ўпершыню. Гэтаму, у першую чаргу, спрыяла значнае павышэнне закупачных цэн на жывёлагадоўчую прадукцыю, якое на працягу года праводзілася некалькі разоў.
Што датычыцца вынікаў работы ў раслінаводстве, то ў планы земляробаў раёна карэктывы ўнесла надвор’е. Тым не менш, нягледзячы на недабор збожжа ў параўнанні з мінулагоднім узроўнем, хлебаробы нашага раёна паспяхова справіліся з выкананнем дзяржзаказа па пастаўках харчовага зерня ўсіх культур. На дзяржаўныя прыёмныя пункты яго было дастаўлена 16 тысяч тон — гэта адзін з самых высокіх паказчыкаў сярод раёнаў Віцебскай вобласці.
Нядрэнным ураджаем парадаваў рапс: з кожнага гектара сабрана па 15,1 цэнтнера насення. Валавы збор насення рапсу ў параўнанні з мінулагоднім узроўнем павялічыўся ў 2,8 раза. Валавая выручка ад рэалізацыі рапса дасягнула 15 мільярдаў рублёў.
У меншай ступені ўмовы надвор’я адбіліся на вырошчванні лёну. Льнаводы раёна сумелі вырасціць рэкордны ўраджай даўгунцу. З кожнага гектара ў сярэднім сабрана па 12,4 цэнтнера валакна. Нарыхтавана рэкордная колькасць ільнотрасты 8724 тоны або ў пераводзе на валакно — 2881 тона.
—Якія гаспадаркі ў гэтым годзе папрацавалі найбольш зладжана эфектыўна?
—Лепшых вынікаў у развіцці сельгасвытворчасці, як і ў папярэднія гады, дабіліся працаўнікі адкрытага акцыянернага таварыства “Праўда-С”, якое ўзначальвае Сяргей Міхайлавіч Дранеўскі. Тут сёлета вырасцілі самы высокі ў раёне ўраджай збожжавых, лёну, рапсу, добра развіваецца жывёлагадоўля. І як вынік, у гаспадарцы самая высокая эфектыўнасць гаспадарання, трывалы фінансавы стан.
Па-ранейшаму ў ліку лідэраў у раёне ў развіцці жывёлагадоўлі і раслінаводства ААТ “Якубава-Агра” і “Гігант-Агра”, якія ўзначальваюць Уладзімір Васільевіч Байголаў і Пётр Іванавіч Жарыкаў.
У гэтым годзе назіраецца прагрэс ў развіцці сельгасвытворчасці ў ААТ “Герой”, якое сёлета ўзначаліў Аляксандр Віктаравіч Парахневіч. Асабліва адчувальная прыбаўка прадукцыі дасягнута ў жывёлагадоўлі. Гаспадарка не дапусціла зніжэння вытворчасці збожжа, тут добра ўрадзіла кукуруза і караняплоды, што дазволіла стварыць нядрэнныя запасы кармоў на зіму.
Заслугоўвае добрых слоў і работа хлебаробаў ААТ “Баброва-Агра”, якім кіруе малады дырэктар Аляксандр Мікалаевіч Мурашкін. Гэта адзіная ў раёне гаспадарка, якая дабілася значнага (на 900 тон) павелічэння валавога намалоту збожжа ў параўнанні з мінулым годам.
—Якія вашы пажаданні сельскім працаўнікам у сувязі з прафесійным святам?
—Шчыра дзякую ўсім, хто працаваў на полі і фермах, перапрацоўваў сельгаспрадукцыю, аказваў шэфскую дапамогу сельгасвытворцам. Ад усёй душы віншую ўсіх працаўнікоў сельскай гаспадаркі і перапрацоўчай прамысловасці, ветэранаў аграрнага сектара эканомікі з прафесійным святам. Жадаю моцнага здароўя, сямейнага дабрабыту, міру, шчасця і надалей сумленна рабіць сваю справу.
Андрэй КВІР.