В Дубровно прошёл шоу-конкурс «Белорусочка»

У раённым Доме культуры Цэнтра народнай творчасці і культурна-дасугавай дзейнасці стала добрай традыцыяй праводзіць розныя шоу-праграмы, якія збіраюць вялікую колькасць гледачоў. Адно з іх, праведзенае зусім нядаўна, мела назву “Беларусачка”.
Аб асаблівасцях данага мерапрыемства апавядае намеснік дырэктара Цэнтра народнай творчасці і культурна-дасугавай дзейнасці Ірына МАЦЮШЭЎСКАЯ.

—Пяць удзельніц школьнага ўзросту, вучаніцы старэйшых класаў гарадскіх школ Крысціна Бацян, Алена Еслікава, Анастасія Балашкова, Анастасія Валчкова і Марыя Гарнякова змагаліся на сцэне раённага Дома культуры за ганаровы тытул “Беларусачка”. Прымаючы ўдзел у шэрагу конкурсаў, якія для іх падрыхтавалі арганізатары мерапрыемства, юныя беларусачкі прадэманстравалі добрае веданне імі беларускай мовы, культуры, беларускіх нацыянальных традыцый. Адчувалася, што ўсе яны ганарацца тым, што нарадзіліся і жывуць у Рэспубліцы Беларусь, з цікавасцю вывучаюць яе гісторыю, пазнаюць культуру і самі нясуць яе ў масы, дасканала вывучаюць побыт нашага народа, яго нацыянальную кухню, абрады і звычаі.

Члены журы, у склад якога ўваходзілі начальнік аддзела ідэалагічнай работы, культуры і па справах моладзі Л.А.Дударава, дырэктар дзіцячай школы мастацтваў Г.У.Пугачоў, супрацоўнікі аддзела адукацыі, спорту і турызму і фінаддзела райвыканкама І.А.Папова і А.В.Богінаў, першы сакратар РК ГА “БРСМ” Т.Л.Марачова, адзначылі добрую падрыхтоўку ўсіх удзельніц конкурснай праграмы і самабытнасць іх выступленняў.

Спецыяльны прыз ад раённай арганізацыі грамадскага аб’яднання БРСМ быў уручаны Алене Еслікавай, якая кожны свой выхад на сцэну арыгінальна аздабляла беларускімі песнямі і прыпеўкамі ва ўласным выкананні.

Прыз гледачоў атрымала Марыя Гарнякова, якая парадавала ўсіх прысутных сваім незвычайным артыстызмам і абаяльнасцю. Усе ўдзельнікі шоу-праграмы “Беларусачка” атрымалі дыпломы за ўдзел у мерапрыемстве.
Галоўны прыз “Беларусачкі” дастаўся Анастасіі Валчковай, старшакласніцы сярэдняй школы №2 горада Дуброўна. Ва ўсіх удзельнікаў мерапрыемства былі групы падтрымкі, якія шчодра ўзнагароджвалі іх апладысментамі. А самадзейныя артысты Дома культуры сваімі выступленнямі запаўнялі ўсе паўзы, пакуль канкурсанткі рыхтаваліся да чарговага выхаду на сцэну. Свята атрымалася надзвычай вясёлым і запамінальным.
Лідзія ЧАПЯЛОВА.