Дубровенский народный ансамбль «Крыніца» награждён высшим званием среди творческих любительстих коллективов
Ужо шмат гадоў радуюць нас сваімі мілагучнымі песнямі ўдзельнікі народнага ансамбля народнай музыкі і песні “Крыніца”. Яны з’яўляюцца сапраўдным упрыгожваннем не толькі святочных канцэртаў і мерапрыемстваў, але і ўсёй дубровенскай зямлі. Невыпадкова, што ў новы год яны ўвайшлі з новым вышэйшым званнем для творчых аматарскіх калектываў — «Заслужаны аматарскі калектыў».
Летам 2010 года на ХVІІ Міжнародным фестывалі песні і музыкі Падняпроўя Расіі, Беларусі, Украіны “Дняпроўскія галасы ў Дуброўне” народнаму ансамблю “Крыніца”, які з’яўляецца пастаянным удзельнікам гэтага мерапрыемства, было прысвоена званне заслужанага аматарскага калектыву Рэспублікі Беларусь.
28 снежня на сцэне раённага Дома культуры начальнік упраўлення культуры Віцеб-скага аблвыканкама, а таксама ганаровы грамадзянін горада Дуброўна Мікалай Пятровіч Пашынскі ўручыў мастацкаму кіраўніку ансамбля “Крыніца” Міхаілу Віктаравічу Шлегу дыплом аб прысваенні звання “Заслужаны аматарскі калектыў”.
—Заслужаны аматарскі калектыў Рэспублікі Беларусь — гэта вышэйшае ў нашай краіне званне для творчых аматарскіх калектываў. У Віцебскай вобласці такіх калектываў 8, а ў Дубровенскім раёне — адзіны. Гэтага статусу па праву ўдастоены ансамбль народнай музыкі і песні “Крыніца”. І мне вельмі прыемна, што з гэтымі людзьмі мы з’яўляемся землякамі. Неаднойчы гэты ансамбль выязджаў з канцэртамі ў суседнія краіны: Расію, Украіну, Польшчу і Латвію. Мы, у сваю чаргу, паспрабуем зрабіць усё магчымае, каб народны ансамбль “Крыніца”, а зараз ужо па праву заслужаны аматарскі калектыў Рэспублікі Беларусь, як мага часцей упрыгожваў сваімі выступленнямі канцэртныя сцэны і нашай краіны, і сцэны нашых суседзяў, — адзначыў Мікалай Пятровіч Пашынскі.
Ганна КАЦІКАВА
