У Дубровенскай бібліятэцы прайшлі мерапрыемствы да Міжнароднага дня роднай мовы
Святкаванне Міжнароднага дня роднай мовы стала традыцыйным мерапрыемствам для дзіцячай бібліятэкі г.Дуброўна, вельмі важным святам для дзяцей і дарослых.
Так, 17 лютага ў бібліятэцы адбыўся шэраг мерапрыемстваў да Міжнароднага дня роднай мовы пад агульнай назвай «Гукі роднай мовы!».
Кожнаму, хто ў гэты дзень завітаў у бібліятэку, прапаноўвалі паўдзельнічаць у паэтычным марафоне, віктарынах. Для самых маленькіх чытачоў бібліятэкары пачыталі беларускія казкі, каб дзеці павучыліся жыццёвай мудрасці ў іх герояў.
У чытальнай зале гучала беларуская музыка і народныя песні. Адчуць прыгажосць і хараство роднай мовы дарослым чытачам дапамагло чытанне вершаў класікаў беларускай літаратуры Я.Купалы, Я.Коласа, М.Танка і інш. Кожны ўдзельнік свята атрымаў парады, як пачаць размаўляць па-беларуску, бо трэба карыстацца роднай мовай, каб яна не адыйшла ў нябыт і ў забыццё.
Спадзяемся, што мерапрыемствы, якія мы прысвяцілі нашай роднай мове, нікога не пакінулі абыякавымі, і мы змаглі данесці, што трэба ведаць і любіць «зямлі бацькоўскай слова»! Любіце, шануйце, паважайце родную мову, размаўляйце на ёй!
Алеся Селюкова, загадчык сектара дзіцячай літаратуры.