«Днепровка» оказалась в эпицентре «Купалья 2011»

У гэты дзень на ўзбярэжжы Дняпра ночка так і не наступіла – вяселле доўжылася да самага світанку. Як і належыць на Івана Купала, людзі шукалі цудоўную папараць-кветку, гукалі асабістае шчасце, скакалі праз вогнішча і проста атрымлівалі асалоду ад неверагодна казачнай ночы…

Што фантастычнага адбылося ў купальскую ноч на берагах шырокага Дняпра, як адзначыў гэтае свята наш родны горад, якія гулянні прайшлі ў яго суседзяў?

На Купалле ў Александрыю

Напачатку звернемся да нашых суседзяў – Магілёўскай вобласці. У ходзе пачатай 6 ліпеня рабочай паездкі Прэзідэнт Рэспублікі Беларусь Аляксандр Лукашэнка прыняў удзел ў свяце “Купалле”, якое прайшло ў аграгарадку Александрыя Шклоўскага раёна.

Кіраўнік дзяржавы наведаў «Горад майстроў», пагутарыў з народнымі ўмельцамі, а затым адправіўся ў глядзельную залу пад адкрытым небам, дзе разгарнулася канцэртная праграма “Купалле над Дняпром”.

Традыцыйным тут стала правядзенне народнага свята. У гэтым годзе на Купалле ў Александрыю прыехалі госці з Расіі і Украіны. Усяго святкаванне сабрала на сваіх прасторах больш за 10 тысяч чалавек.

Свята на Дняпры

Таксама ў ноч з 6 на 7 ліпеня і ў ва ўсіх куточках Дуброўна адзначалі цудадзейнае свята Купалле. Самыя масавыя гулянні разгарнуліся на левым узбярэжжы Дняпра. Нягледзячы на тое, што святочны дзень прыпаў на сярэ-дзіну тыдня, людзі вялікімі дружнымі гуртамі прыходзілі на месца падзей на працягу ўсяго вяселля.

Работнікі раённага арганізацыйна-метадычнага цэнтра, апрануўшы народныя ўбранні, арганізавалі для гледачоў цікавае тэатралізаванае прадстаўленне гэтага старажытнага свята. Таксама тут была ўладкавана пляцоўка для танцаў і, безумоўна, неад’емны атрыбут Купалля – высокае вогнішча, якое рытуальна апоўначы асвяціла ўзбярэжжа Дняпра.

Шмат цікавых заняткаў можна было адшукаць на святочнай пляцоўцы. І дзеці, і дарослыя атрымалі магчымасць пакатацца па Дуброўне на кані. А маладыя хлопцы і дзяўчаты тым часам плялі вянкі, спявалі “Купалінку”, вадзілі карагоды ля агню, а самыя храбрыя адважыліся пайсці шукаць папараць-кветку.

І па сённяшні дзень для ўсіх застанецца таямніцай існаванне гэтай фантастычнай кветачкі, але, спадзяемся, што ў гэтую светлую купалальскую ночку кожнаму пашчасціла здабыць самае неабходнае для сябе — радасць, шчасце, каханне і проста добры настрой…

Ганна КАЦІКАВА

P.S. Купальскі фотарэпартаж