Дубровенщина заготовляет дрова
Лета — самы час паклапаціцца аб назапашванні паліва на зіму. Сёлета сітуацыя па забеспячэнню насельніцтва палівам складваецца няпростая. Па-першае, з-за ўзросшых цэн на паліва, у тым ліку і на торфабрыкет, запланаваных у бюджэце сродкаў на датацыю кошту паліва насельніцтву недастаткова. Па-другое, у Дубровенскім філіяле абласнога ўнітарнага прадпрыемства “Віцебскоблтоп” утварылася вялікая чарга па забеспячэнню насельніцтва палівам.
Як паведамілі карэспандэнту газеты работнікі гэтай арганізацыі, сёння тут ставяць на чаргу на атрыманне дроў у верасні, а торфабрыкету — у лістападзе. Ды і цэны на паліва нават з датацыяй у гэтай арганізацыі высокія.
Так, 1 кубаметр дроў 2-мятровымі хлыстамі каштуе 30 тысяч рублёў, а за машыну такіх дроў жыхару г.Дуброўна давядзецца заплаціць 260 тысяч рублёў.
Калі ж дровы парэзаны на чуркі, то кошт машыны дроў павысіцца да 360 тысяч рублёў, а колатых — да 430 тысяч рублёў.
Адна тона брыкету каштуе 85 тысяч рублёў, а машына торфабрыкету — 446 тысяч рублёў.
Для сельскіх жыхароў кошт дроў і брыкету, дастаўленых з райпалзбыту ў залежнасці ад адлегласці дастаўкі: за кожны кіламетр дастаўкі паліва аўтамабілем трэба заплаціць 5 тысяч рублёў, трактарам —6 тысяч рублёў.
Таму ў склаўшайся сітуацыі райвыканкам настойліва раіць працаздольнаму насельніцтву неадкладна заняцца нарыхтоўкай дроў уласнымі сіламі, што, па-першае, будзе значна танней, чым купляць іх у райпаліўзбыце, а, па-другое, гарантавана сустрэць зіму з неабходнымі запасамі паліва.
Днямі наш карэспандэнт сустрэўся з ляснічым Дубровенскага лясніцтва Уладзімірам Рыгоравічам Свішчовым і папрасіў яго расказаць, дзе і якім чынам жыхары раёна могуць нарыхтаваць дровы на прадстаячую зіму.
—Нарыхтоўка дроў вядзецца ва ўсіх лясных масівах раёна ў месцах высечкі галоўнага карыстання, высечкі догляду лесу і суцэльнай высечкі засохшага ельніка. Так што ў сельскіх жыхароў пераважнай большасці вёсак ёсць рэальная магчымасць запасціся дравамі на зіму з ляснога масіва, які размешчаны ў непасрэднай блізасці ад населенага пункта, дзе яны жывуць, — гаворыць Уладзімір Рыгоравіч Свішчоў. — Пры гэтым не трэба прад’яўляць ніякіх даведак. Дастаткова вусна звярнуцца да работнікаў лясной аховы, якія працуюць у тым ці іншым лясным масіве Дубровенскага, Кляноўскага і Асінторфскага лясніцтваў, з просьбай аб выдзяленні дроў. Дровы лясніцтвы адпускаюць у гатовым выглядзе з прамежкавых складаў у лесе і, пры жаданні, грамадзяне могуць весці іх нарыхтоўку ўласнымі сіламі.
—Гэта значыць, чалавек бярэ пілу і сякеру, ідзе ў лес, сам спілоўвае дрэвы, якія пакажа ляснік, і потым самастойна дастаўляе іх дамоў. Так калісьці, памятаю, рабіў мой бацька. Прынцыпы саманарыхтоўкі дроў засталіся такія ж і сёння? — задаю пытанне Уладзіміру Свішчову.
—Крыху не такія. Сёння, згодна з правіламі бяспекі работы ў лесе, валка дрэў дазваляецца толькі людзям, якія маюць для гэтага спецыяльны допуск — вальшчыкі, работнікі лясной аховы. Усе іншыя аперацыі па нарыхтоўцы дроў: раскрыжоўка, зсяканне голля, складзіраванне ў раўметры, уборка тэрыторыі, дзе праводзілася нарыхтоўка і дастаўка да дому, праводзяцца самім заказчыкам. Кошт дроў пры саманарыхтоўцы, вядома ж, значна таннейшы, чым гатовых.
—І колькі каштуе сёння 1 кубаметр дроў, нарыхтаваных грамадзянінам уласнымі сіламі?
—Цана залежыць ад віду драўніны. На сённяшні дзень (12 ліпеня — заўв. аўтара) адзін кубаметр дроў з асіны, елкі і вярбы каштуе 13400 рублёў, хвоі і алешніка — 17000 рублёў, бярозы і дуба — 18500 рублёў. Калі дастаўка дроў ажыццяўляецца транспартам лясніцтва, то такая паслуга каштуе 35 тысяч рублёў за 1 гадзіну выкарыстання транспартнага сродку. Такім чынам, 7 кубаметраў дроў без уліку транспартных расходаў у залежнасці ад віду драўніны каштуюць ад 95 да 130 тысяч рублёў. Хачу звярнуць увагу на тое, што ў сувязі з тым, што лясніцтвам даводзіцца план вывазкі дроў дзяржаўным прадпрыемствам (БелДРЭС, райпаліўзбыт, установы аддзела адукацыі, прадпрыемства жыллёва-камунальнай гаспадаркі) паслугі па дастаўцы дроў насельніцтву транспартам лясніцтва мы ажыццяўляем па меры магчымасці. Таму лепш за ўсё звярнуцца за такой паслугай у прадпрыемствы горада ці ў сельгаспрадпрыемствы.
—Ці ёсць абмежаванні ў аб’ёме нарыхтоўкі дроў уласнымі сіламі для насельніцтва?
—Такія нормы не ўстаноўлены. Нашы работнікі выдзяляюць столькі дроў, колькі просіць грама-дзянін. Хачу яшчэ раз падкрэсліць, што сельскае насельніцтва можа нарыхтоўваць дровы ў лясных масівах, якія бліжэй за ўсё да іх вёскі, а гэта, як правіла, не перавышае 2-3 кіламетраў.
Са слоў ляснічага Дубровенскага лясніцтва Уладзіміра Рыгоравіча Свішчова, стала зразумела, што нарыхтоўка дроў уласнымі сіламі ім абыдзецца значна танней, чым купляць дровы ў гатовым выглядзе ў райпаліўзбыце ці на складах лясніцтваў. Таму, каму патрэбна паліва на зіму, ёсць сілы і магчымасці, лепш за ўсё неадкладна звярнуцца да работнікаў лясной аховы з просьбай аб выдзяленні ўчасткаў для нарыхтоўкі дроў уласнымі сіламі. Не адкладвайце гэтую справу на восень з кароткімі днямі і часцей за ўсё дажджлівым надвор’ем. Памятайце, што ў першую чаргу райпаліўзбыт забяспечвае палівам ільготную катэгорыю грамадзян. Ды і з цягам часу кошт паліва, у тым ліку і на дровы, можа павысіцца.
Таксама, Уладзімір Рыгоравіч Свішчоў нагадаў парадак водпуску насельніцтву дзелавой драўніны.
—Дзелавая драўніна насельніцтву для правядзення рамонтных работ адпускаецца па даведках сельскіх Саветаў ці райвыканкама ў аб’ёме да 5 кубаметраў, — гаворыць ляснічы Дубровенскага лясніцтва. — Водпуск дзелавой драўніны для рамонту жылых дамоў і гаспадарчых пабудоў, якія пашко-джаны стыхійнымі наступствамі (ураган, павадкі, пажар) ажыццяўляецца па рашэнню райвыканкама ў аб’ёме, неабходным для аднаўлення пабудоў.
Кошт дзелавой драўніны складае ад 70 да 100 тысяч рублёў за 1 кубаметр, а жэрдак (дробнатаварная драўніна) — 65 тысяч рублёў. 1 кубаметр складае 25 шасцімятровых жэрдак.
Андрэй КВІР