К Новому году в Дубровно планируют новоселье

У пачатку чэрвеня гэтага года, на паўгода пазней, чым планавалася, будаўнікі БУ-40 Аршанскага будтрэста № 18 здалі ў эксплуатацыю пяціпавярховы 40-кватэрны дом па вуліцы Аршанская. Але наваселлі тут адбыліся значна пазней: больш як месяц будаўнікам спатрэбілася на ліквідацыю недаробкаў і браку, якія выявілі навасёлы. Нагадаем, што дом пабудаваны за кошт ільготных банкаўскіх крэдытаў грамадзян пад 1 працэнт гадавых.

Паралельна з завяршэннем будаўніцтва гэтага дома сёлетняй вясной будаўнікі БУ-40 пачалі ўзвядзенне яшчэ аднаго такога ж дома, які будуецца за кошт ільготных банкаўскіх крэдытаў грамадзян. Згодна з планам яго будаўніцтва павінна быць завершана да канца гэтага года.

У трэцяй дэкадзе верасня мы пабывалі на гэтай новабудоўлі. Дом пакуль «вырас» на тры паверхі. Для завяршэння яго будаўніцтва, за тры месяцы, якія засталіся да новага года, неабходна ўзвесці два паверхі і дах, правесці ўнутраныя аддзелачныя работы, зманціраваць водаправодную, каналізацыйную, ацяпляльную і газазабяспечваючую сістэмы, а таксама добраўпарадкаваць тэрыторыю. Гэта значыць, што засталося асіліць большы аб’ём работ, чым ужо выкананы. Калі ўлічыць той факт, што з пачатку будаўніцтва мінула пяць месяцаў (палі пад падмурак дома пачалі забіваць 21 красавіка), то становіцца відавочным, што будаўнікі БУ-40 значна адстаюць ад графіка будаўніцтва. Чаму? З такім пытаннем мы звярнуліся да прараба будоўлі Анатоля Сяргеевіча ДЗЯНІСАВА.

—У сувязі са складанай фінансавай сітуацыяй сёлета ў нашай краіне ў жніўні ўзніклі праблемы з паступленнем будаўнічых матэрыялаў, — гаворыць Анатоль Дзянісаў. — Тры тыдні нашы муляры сядзелі без справы. Цяпер вось даводзіцца наганяць упушчаны час…

—І што канкрэтна для гэтага робіцца?

—З верасня будаўніцтва дома ідзе ў дзве змены, — расказвае Анатоль Дзянісаў. — У кожнай змене замест 12 будаўнікоў па норме, задзейнічаны 20. Работы пачынаем у восем гадзін раніцы, а заканчваем запаўнач. Разлічваем, калі ў далейшым не будзе перабояў з пастаўкамі будаўнічых матэрыялаў, да канца года здаць дом у эксплуатацыю.

У пацвярджэнне свайго прагнозу прараб адзначыў, што для завяршэння будаўніцтва астатніх двух паверхаў спатрэбіцца паўтара месяца. Яшчэ месяц — на мантаж даху. Такім чынам, па самых аптымістычных прагнозах, узвядзенне дома пад дах завершыцца толькі ў снежні. А яшчэ трэба правесці аддзелачныя работы, зманціраваць усе сістэмы, на што таксама спатрэбіцца шмат часу.

—Нашы субпадрадчыкі не будуць чакаць, пакуль завершым усе будаўнічыя работы, а ў хуткім часе пачнуць мантаж каналізацыі, водаправода, ацяпляльнай сістэмы. Дарэчы, ужо цяпер брыгада з “Белсантэхмантажу” працуе на пракладцы камунікацый у падвальных памяшканнях, — тлумачыць Анатоль Дзянісаў.

—А што перашкодзіла ў мінулым годзе закончыць будаўніцтва дома ў вызначаныя тэрміны? — пацікавіўся я ў прараба.

—Не падключылі газавую сістэму, ад якой працуе ацяпляльная сістэма. Па гэтай прычыне ў зімовых умовах мы не маглі весці аддзелачныя работы, — гаворыць Анатоль Дзянісаў.

Пазней работнікі аддзела будаўніцтва і архітэктуры райвыканкама паведамілі, што ў доме не быў своечасова завершаны мантаж ацяпляльнай сістэмы. Таму работы па завяршэнню будаўніцтва дома былі адкладзены на вясну гэтага года.

Мне давялося гутарыць з радавымі будаўнікамі. Брыгадзір муляраў Сяргей Уладзіміравіч Аўрамаў адзначыў, што тэмпы будаўніцтва залежаць у першую чаргу ад паступлення на будаўнічую пляцоўку неабходных матэрыялаў. Калі ў далейшым перабояў у забеспячэнні матэрыяламі не будзе, то пры належнай арганізацыі работ будаўніцтва дома будзе завершана ў вызначаны тэрмін.

Варта заўважыць, што пастаўкай матэрыялаў на будоўлю займаецца ўпраўленне вытворчымі работамі Аршанскага будтрэста № 18, у склад якога ўваходзіць і генпадрадчык будоўлі БУ-40. Гэта значыць, што тэмпы работ на будаўніцтве дома залежаць ад узаемасувязі гэтых двух падраздзяленняў, якія падпарадкоўваюцца кіраўніцтву Аршанскага будаўнічага трэста № 18.

Намеснік старшыні райвыканкама па будаўніцтву, архітэктуры і ЖКГ Аляксандр Аляксеевіч Шатраўка, да якога мы звярнуліся за каментарыем хода будаўніцтва дома па вуліцы Аршанская, адзначыў:

—Калі кіраўніцтва Аршанскага будтрэста № 18 тэрмінова не прыме меры па павышэнню тэмпаў будаўніцтва дома, а для гэтага неабходна арганізаваць работу не ў дзве, а ў тры змены, то няма ніякай гарантыі, што будаўніцтва дома па вуліцы Аршанская ў вызначаныя тэрміны будзе завершана.

Як бачым, сітуацыя з узвядзеннем другога 40-кватэрнага дома па вуліцы Аршанская можа пры пэўных абставінах развівацца па леташняму сцэнарыю і сарака сем’ям дубровенцаў давядзецца адкласці наваселлі ў новых кватэрах на лета наступнага года.

Андрэй КВІР