Умельцы народного клуба «Дубрава» провели новогодний мастер-класс для дубровенцев

У цэнтры размясцілася прыгажуня-елачка, побач з ёй – невялічкі штакетнік, які ўпрыгожвае традыцыйная лапікавая коўдра, тут жа – гліняныя гарлачыкі, саматканыя ручнікі і паясы. А пад елкай цудоўная кампанія – саламяная каза, конь ды лялька. І такое ўсё незвычайнае, прагожае, казачнае, нават здаецца, што завіталі мы на навагодні агеньчык у самабытную вёсачку да сваіх бабуль і дзядуль. Як жа адбылося такое фантастычнае перамяшчэнне ў прасторы?

Усё незвычайнае проста: мы апынуліся на навагоднім агеньчыку ў майстроў з народнага клуба “Дубрава”, які адбыўся 28 снежня ў актавай зале Школы мастацтваў.

На сцэне разгарнулася невялічкае зімовае шоу з гульнямі і забавамі. Падчас мерапрыемства гасцям і маленькім гледачам народныя ўмельцы не толькі прадэманстравалі свае таленавітыя работы, але і падзяліліся сакрэтамі незвычайных майстэрстваў і ўменняў.

Чалавек, улюблёны ў сваё дзела, майстрыца лапікавага шыцця, віртуозная лялечніца, чые работы – заўжды прыемны і жаданы падарунак для гасцей міжнароднага фестывалю “Дняпроўскія галасы ў Дуброўне” – Святлана Мікалаеўна Дземянкова расказала гасцям, завітаўшым на агеньчык, як у сцюдзёную зімовую пару сагрэцца цёплай коўдрай, зробленай сваімі рукамі з сотняў маленькіх рознакаляровых лапікаў.

Затым Іна Міхайлаўна Давыдава прадэманстравала ўсім прысутным свае керамічныя вырабы і расказала пра ганчарства чорнага дымлення, што існавала на Дубровенскіх землях у пачатку ХХ стагоддзя.

Потым ткачыха Алена Анатольеўна Капытоўская паведаміла пра сваю творчасць – тэхніку пляцення паясоў.

А напрыканцы вядучыя мерапрыемства і майстрыца народнага клуба “Дубрава” Валянціна Васільеўна Квір, чыё імя ўвайшло ў каталог “Саламяных спраў майстроў Віцебшчыны”, пазнаёмілі гасцей з той самай незвычайнай саламянай кампаніяй – памятаеце: каза, конь ды лялька? Дык вось усе яны зроблены пры дапамозе звычайнай саломкі і, безумоўна, залатых рук народных умельцаў.

Падчас майстар-класу вучні з сярэдніх школ № 1 і № 2 горада Дуброўна прымалі ўдзел у гульнях, якія калісьці так любілі нашы продкі: на хуткасць дзеткі абматваліся ў саматканыя паясы, дудзелі ў гліняныя свістулькі, безумоўна, не абышлося і без самай галоўнай традыцыі – упрыгожвання елкі, але на гэты раз убраннямі навагодняга дрэўца сталі саламяныя званочкі і ледзяшы, зробленыя рукамі Валянціны Васільеўны Квір.

Напрыканцы сустрэчы вядучая і арганізатар мерапрыемства, кіраўнік народнага клуба “Дубрава”, Вольга Сярееўна Аляксеева падзякавала гасцям за ўвагу і актыўны ўдзел у прапанаваных гульнях, павіншавала ўсіх з навагоднімі святамі і звярнулася да майстроў клуба:

—Хочацца павіншаваць таленавітых людзей, улюблёных у сваю справу, актыўных удзельнікаў народнага клуба “Дубрава”. Жадаем ім творчых поспехаў, здзяйснення ўсіх мараў, здароўя і шчасця. Дзякуй вам за тое, што робіце наша жыццё прыгожым, — адзначыла Вольга Аляксеева.

Пасля выступлення былі падведзены вынікі адыходзячага года і адбылося ўрачыстае ўзнагароджванне ўдзельнікаў агляду-конкурсу Сувенір-брэнд Віцебшчыны “Цвяток радзімы васілька”.

Дыпломы і памятныя падарункі атрымалі майстры народнага клуба “Дубрава” Галіна Уладзіміраўна Шаўчэнка, Эдуард Ягоравіч Гендрых, Валянціна Васільеўна Квір, Таццяна Васільеўна Дробат, Надзея Генадзеўна Кускова, Кацярына Аляксандраўна Сардэчкіна.

Таксама за персанальную выставу, індывідуальнасць у творчасці, актыўную дзейнасць і мэтанакіраванасць па выніках 2011 года дыпломам была ўзнагароджана знакамітая майстрыца Дубровеншчыны, якая ў мінулым годзе святкавала свой юбілей, Наталля Мікалаеўна Камароўская.

У цёплай сяброўскай абстаноўцы прайшла культурная сустрэча. Адпаведна навагодняй традыцыі, усе госці вярталіся дадому з падарункамі: дзеці – з салодкімі пачастункамі, майстры – з заслужанымі ўзнагародамі… І, прызнаемся вам па сакрэту, пасля гэтага шчодрага навагодняга агеньчыку, нават на нашай рэдакцыйнай елачцы з’явіліся новыя ўбранні – саламяныя званочкі і ледзяшы.

Ганна КАЦІКАВА