В Дубровенском доме культуры царило «Цветочное настроение»

У краіне духмяных кветак

Вы бачылі калі-небудзь багіню Флору? Не? А вось жыхарам нашага маленькага ўтульнага горада пашчасціла з ёй пазнаёміцца. Яна (Марына Вароніна, дырэктар Дубровенскай райкінавідыасеткі) у аўторак у РДК адкрывала цудоўнейшую выставу кветак «Кветкавы настрой». А якія ж там кампазіцыі незвычайныя, проста дзіву даешся, адкуль бяруцца ў людзей такія задумы. Але ж і творчы народ жыве на Дубровеншчыне!

У гэтым годзе ўсім удзельнікам, якіх было нямала, прыйшлося паламаць галаву над кампазіцыямі. Адразу ўзнікае пытанне: чаму? Ды вельмі проста, надвор’е нас не радавала летам: то навальніца і дзікі вецер, то град, памерам амаль з курынае яйка, тут дрэва не вытрымае, не тое, што кветка.
І калі дубровенцы пачулі пра конкурс, доўга думалі, што ж можна зрабіць з таго, што ў кветніку ўцалела. І, скажу я вам, няблага ў іх атрымалася! Чаго тут толькі не ўбачыш: і вясёлыя выратавальнікі, і салодкая парачка, і маманценак, і куранятка, кветкавая кніга, і куфар са скарбам, і стажок сена, усяго і не пералічыш, трэба ўсе на свае вочы пабачыць.

Так, складана прыйшлося журы, але яны добра справіліся са сваёй нялегкай задачай. У склад судзейскай камісіі ўвайшлі: галоўны спецыяліст аддзела культуры Дубровенскага райвыканкама Інэса Вітальеўна Крукоўская, галоўны бухгалтар інспекцыі прыродных рэсурсаў і навакольнага асяроддзя Таццяна Аляксандраўна Вароніна, галоўны спецыяліст аддзела ідэалагічнай работы Дубровенскага райвыканкама Аксана Іванаўна Петрыкава.

Пакуль журы абмяркоўвала работы, багіня Флорa вырашыла даведацца, як нарадзілася кожная кампазіцыя.
«Гэта задума ўсяго калектыву. Гэты год — Год кнігі, і мы вырашылі не адыходзіць ад гэтай тэматыкі. Бо бібліятэкар – захавальнік каштоўнасцей, таму наша кампазіцыя называецца «Неугасающие ценности». А для таго, каб чалавек захацеў пыдысці і адкрыць кнігу, мы зрабілі такую вось закладку, на якой напісалі словы А. П. Чэхава «Все бледнеет перед книгами». Вось так з’явілася наша кампазіція», – падзялілася з намі загадчыца аддзела маркетынгу цэнтральнай раённай бібліятэкі Таццяна Букаткіна.

Расказала пра работу свайго калектыва і дырэктар рабочай групы па стварэнні музея аддзела культуры Дубровенскага райвыканкама Наталля Сяргееўна Аўчарова: «Называецца наша кампазіцыя «Дубровенскі скарб». Думкі па яе стварэнні навеяў помнік археалогіі – гарадзішча Вежкі. Пад час раскопак у канцы дзевяностых там быў знойдзены сапраўдны скарб, праўда, наш сенняшні куфар з каштоўнасцямі адрозніваецца ад таго”.

Многіх зацікавіла кампазіція «Варажэя» Цэнтра дзяцей і моладзі. «Мы вырашылі паглядзець, што зараз цвіце ў нас на лугах. Такое шматтраўе, такое буйства колераў! І вось мы вырашылі стварыць кампазіцыю ў асноўным з лекавых траў: рамонкі, зверабой, крываўнік,» – расказала нам метадыст Цэнтра дзяцей і моладзі Алена Сяргееўна Віткоўская.

Пасля таго, як мы даведаліся пра гісторыю з’яўлення на свет большасці кампазіцый, у зал увайшло журы, каб назваць пераможцаў, але іх тут чакаў сюрпрыз. Работнікі дзіцячай бібліятэкі прынеслі яшчэ некалькі цікавых кветкавых шэдэўраў. Таму прыйшлося нашаму журы зноў прыступіць да абмеркавання. У гэты раз нам зусім не доўга давялося чакаць прысуду судзейскай камісіі.

А ён быў такі: у намінацыі «За адпаведнасць эстэтычнага густу» месцы раздзяліліся наступным чынам: першае атрымала кампазіцыя сярэдняй школы № 1 «Кветкі для першай настаўніцы», другое дасталася тэрытарыяльнаму цэнтру сацыяльнага абслугоўвання насельніцтва за кампазіцыю «Пяшчота», трэцяе – дзіцячай бібліятэцы за ўсе іх дзівосныя працы.

У наступнай намінацыі «За арыгінальнасць ідэі і творчай задумы» дыплом за першае месца атрымала кампазіцыя аддзялення кругласутачнага знаходжання ТЦСАН «Рыбак», другое — цэнтральная раённая бібліятэка, трэцяе – кампазіцыя раённага Дома культуры «Не будзі ўспамінаў». Трэцяй была названа намінацыя «За кампазіцыйнае рашэнне». У ей пераможцамі сталі: сад-яслі №3 горада Дуброўна, якому за ўсе працы было прысуджана першае месца, другое – Цэнтру дзяцей і моладзі, трэцяе – сярэдняй школе № 1 за кампазіцыю «Забаўны карэньчык».

У апошняй намінацыі «За тэхніку састаўлення і выразнасць сродкаў афармлення» лепшымі былі прызнаны такія кампазіцыі: «Вяселыя выратавальнікі» (Дуброўнарайгаз), «Салодкая парачка» (Станіславоўскі СДК), «Хто куды, а я плыву на спатканне» (Ерамееўскі СДК).
А пасля таго, як усе пераможцы былі названы, гледачы яшчэ доўга не разыходзіліся. Бо так было цудоўна ў гэтай краіне кветак, што здавалася гадзінамі глядзеў бы на такія незвычайныя шэдэўры.

Валянціна ШАВЯКА.

ЗАГЛЯНИТЕ НА «ФОТОМИНУТКУ»!