Дубровенские работники культуры на районном семинаре научились правильно готовить колядную кутью

20 студзеня ў Калінкаўскім сельскім доме культуры прайшоў чарговы районны семінар для работнікаў культуры “Роля ўстаноў культуры ў адраджэнні нацыянальных традыцый і абрадаў. Святы народнага календара”.

Спачатку дырэктар раённага арганізацыйна-метадычнага цэнтра Таццяна Уладзіміраўна Старавойтава пазнаеміла культработнікаў з задачамі аднаўлення, зберажэння, падтрымкi, аховы i папулярызацыi традыцыйнай культуры. Гэта адзін з прыярытэтных напрамкаў дзейнасці ўстаноў культуры. Расказала Таццяна Уладзіміраўна і пра фарміраванне і эвалюцыю беларускага народнага календара.

Інэса Вітальеўна Крукоўская, галоўны спецыяліст аддзела культуры, прадэманстравала спосабы зберажэння і захавання нематэрыяльнай культурнай спадчыны.

Вольга Юр’еўна Машукова, рэжысёр РАМЦ, яшчэ раз узгадала святы і абрады народнага календара, а таксама дала рэкамендацыі і сцэнарныя матэрыялы для правядзення святаў народнага календара Масленіца і Купалле.

А так як святам, якое нядаўна адсвяткавалі на Беларусі, былі Каляды, то работнікі культуры пазнаемілі ўсіх прысутных з асаблівасцямі калядных вандровак на Дубровеншчыне (на вопыце работы народнага фальклорнага калектыву “Кудзеліца”).

А якія ж Каляды без куцці? А вось навучыцца правільна гатаваць сапраўдную калядную куццю ўсім дапамог прагляд тэлеперадачы “Беларуская кухня”, знятай тэлеканалам «Беларусь-2» з удзелам загадчыцы Баброўскага сельскага клуба да свята Нараджэння Хрыстова.

А пасля семінара ўсіх чакала цікавае паказальнае мерапрыемства Калінаўскага СДК: тэатралізаванае прадстаўленне “Шчодры вечар, багаты вечар”.

Валянціна ШАВЯКА