У Сваташыцах адбылося свята «Калядны Фэст»
Традыцыйнае раённае свята «Калядны Фэст» прайшло у аграгарадку Сваташыцы. Мерапрыемства з асабліва святочнай, вясёлай атмасферай, з’яўляючыся своеасаблівым звяном паміж гісторыяй, традыцыямі і сучаснасцю, праходзіць на Дубровеншчыне ўжо ў трэці раз.
Радаваць жыхароў Сваташыц песнямі, танцамі, народнымі гульнямі і дарыць добры настрой прыехалі ўдзельнікі народнага фальклорнага калектыву «Кудзеліца», фальклорнага калектыву «Грамніцы» і гурт калядоўшчыкаў «Шчадрыца». Апошні аб’яднаў культработнікаў з Дабрыні, Сваташыц, Асінторфа, Ерамееўшчыны, Калінаўкі. Яшчэ адзін калектыў «Шчадроўшчыкі» сабраў таленавітых артыстаў са Станіславова, Лядоў, Заруб, Буды і Сіпішчава.
Калядоўшчыкі, прытрымліваясь даўніх традыцый свята, прайшліся па вуліцах аграгарадка Сваташыцы і пабывалі ў гасцях у жыхароў. Тыя, у сваю чаргу з радасцю прымалі ад калядоўшчыкаў цёплыя пажаданні з Новым годам і Калядамі. Усе разам спявалі народныя песні, танцавалі, а таксама паўдзельнічалі ў абрадзе «Вадзіць казу», пасля чаго таленавітыя артысты былі шчодра адораны.
Жыхары аграгарадка, адкінуўшы свае справы, далучыліся да ўсеагульнага вяселля.
Калядоўшчыкі прыйшлі ў Сватащыцкі СДК, дзе ў зале з нецярпеннем іх чакалі гледачы. Тэатралізаваны канцэрт, нікога не пакінуў абыякавым: уся ўвага гледачоў была засяроджана на маляўнічых выступах фальклорных калектываў, конкурсах, у якіх змаглі паўдзельнічаць і жыхары.
Але галоўнай часткай свята былі спаборніцтвы паміж групамі калядоўшчыкаў, па выніках якіх вядучыя свята абвясцілі лепшых з лепшых.
Так, у намінацыі «Лепшы Калядны персанаж» у прыпевачным батле сярод калядных коз перамогу атрымала Антаніна Марозава з Калінаўскага СДК, «Лепшую Калядную зорку» змайстравалі супрацоўнікі Ерамееўскага СДК, а «Лепшым Калядным гуртом» стаў калектыў калядоўшчыкаў «Шчадрыца».
Пасля заканчэння канцэрта жыхары Сваташыц яшчэ доўга не хацелі разыходзіцца, з цікавасцю абмяркоўвалі асобныя моманты свята і яркія вобразы артыстаў. Культработнікі ж, у сваю чаргу, прадумваюць новыя ідэі свята. Але пройдзе яно ужо ў іншым аграгарадку.
Вікторыя БУЛЫЧОВА.
