Чем гостей и жителей удивит фестиваль «Дняпроўскія галасы ў Дуброўне»
Брэндам Дубровенскага раёна на працягу апошніх гадоў, безумоўна, з’яўляецца Міжнародны фестываль песні і музыкі «Дняпроўскія галасы ў Дуброўне». Мы так зжыліся з гэтай культурнай з’явай, что, калі ў мінулым годзе з-за пандэміі фестываль не праводзіўся, то нібыта і лета зусім не атрымалася. Таму з такой цікавасцю і нецярпеннем чакае Дубровеншчына фестываль 2021 года. Пра тое, якім ён будзе, якія змены і навінкі прапануе гледачам праграма фэста, мы паразмаўлялі з Людмілай Дударавай, начальнікам аддзела ідэалагічнай работы, культуры і па справах моладзі Дубровенскага райвыканкама.
—Людміла Аляксееўна, як будзе праходзіць фестываль у гэтым годзе?
—Міжнародны фестываль «Дняпроўскія галасы ў Дуброўне» будзе праходзіць у свой звычайны тэрмін — у апошнія выхадныя чэрвеня, а дакладней 25,26,27 чэрвеня. Але ж алгарытм свята некалькі змяніўся: так, вялікі эстрадны канцэрт з феерверкам вырашана перанесці на вечар суботы, каб пабачыць гэта мелі магчымасць не толькі жыхары нашага раёна, але і госці фестывалю.
—За шмат гадоў наш фестываль ужо атрымаў свой непадобны на іншыя культурныя мерапрыемствы твар, кожны дубровенец ведае асноўныя старонкі праграммы. Сярод іх урачыстая сустрэча ўздзельнікаў, іх прывітальны канцэрт-прэзентацыя, знаёмства з фестывальнымі праектамі, горад майстроў, яскравае шэсце і гала-канцэрт… Але ж кожны год арганізатары знаходзілі нешта новае, адметнае. Чым на гэты раз будзе ўражваць фестываль?
— Фестываль ўвогуле будзе прысвечаны Дню вызвалення Дубровенскага раёна ад нямецка-фашысцкіх захопнікаў і Году народнага адзінства. Таму у межах фестывалю ўпершыню пройдзе навуковая краязнаўчая канферэнцыя «Подзвігу жыць у вяках», дзе слухачы змогуць даведацца пра даследчую работу, якую праводзяць музеі і краязнаўцы Віцебска, Оршы, Лёзна і Дуброўна. Таксама ўпершыню пройдзе абласны адкрыты пленэр традыцыйнай глінянай цацкі «Салавейка 2021», прысвечаны дубровенскаму майстру Ганне Марачовай. Раней праводзіўся толькі конкурс гліняных вырабаў. Але зараз наша цацка атрымала статут Нематэрыяльнай каштоўнасці. Таму і конкурс выйшаў на іншы ўзровень. Майстры з розных куткоў з’едуцца, каб спачатку пазнаёміцца з гісторыяй і народнымі рамёствамі Дубровеншчыны, а потым пад уплывам гэтых звестак зрабіць сваю цацку-свістульку.
Другі раз на фестрываль завітаюць удзельнікі абласнога агляду-конкурсу эстраднай музыкі «ВІАton — 2021». Безумоўна, заслугоўвае ўвагі і выстава «Легенды, паданні і казкі Віцебшчыны ў маляваных дыванах», якая будзе працаваць у краязнаўчым музеі, і выстава фотаздымкаў у ДШМ «Дубровеншчына. Знаёмая і незнаёмая», дзе можна будзе пабачыць не толька сучасныя фатаграфіі, але і даваенныя, і больш старых гадоў. Плануецца да праектаў «Дыван сяброўства» і «Лялька Дубравушка» далучыць яшчэ адзін: удзельнікі фестывалю разам сплятуць традыцыйны дубровенскі пояс-абярэг.
— Так, вельмі насычаная праграма. Але ж не магу не спытать: што чакае гледача ў суботу вечарам?
—Як я ужо паведаміла, канцэрт артыстаў эстрады Рэспублікі Беларусь у гэтым годзе перанесены з нядзелі на суботу. У праграме «Зорная ноч над Дняпром» прымуць удзел такія зоркі беларускай эстрады, як Аляксандр Сухараў, студыя «Верасы» і група «Las Vegas», — адказала Людміла Дударава.
Мяркую, што праграма фестывалю «Дняпроўскія галасы ў Дуброўна» разнастайная і адпавядае патрабаванням на розны густ і ўзрост. За межамі нашай размовы засталося яшчэ шмат чаго цікавага. Сачыце за нашымі публікацыямі, інфармацыяй на сайте і ўлівайцеся ў плынь фестывалю.
Алена КАРСАКОВА
