На Дубровенщине откроют крупный развлекательный комплекс

19 лістапада ў раённым Доме культуры перад пачаткам урачыстасцяў з нагоды Дня работнікаў сельскай гаспадаркі і перапрацоўчай прамысловасці АПК адбыўся інвестыцыйны форум, у якім прынялі ўдзел прадстаўнікі ААТ “Аршанскі КХП”, ААТ “Аршанскі малочны камбінат”, ААТ “Дубровенскі льнозавод”. Гэтыя прадпрыемствы пры дапамозе прыгожа аформ-леных стэндаў прадставілі ўзоры прадукцыі, якую яны вырабляюць.

На форум таксама прыбыў расійскі бізнесмен, дырэктар таварыства з абмежаванай адказнасцю “БелРосТоргСбыт” Фарыд Халітавіч Сабітаў.

Форум адкрыў намеснік старшыні раённага выканаўчага камітэта Мікалай Мікалаевіч Рандарэвіч, які расказаў пра работу, якую праводзіць райвыканкам па прыцягненню інвестыцый у развіццё эканамічнай і сацыяльнай сфер раёна.

У прыватнасці, ён адзначыў, што на форум прыбыў дырэктар ТАА “БелРосТоргСбыт” Ф.Х.Сабітаў з жаданнем падпісаць пратакол аб намерах супрацоўніцтва паміж Дубровенскім райвыканкамам і ТАА “БелРосТоргСбыт” у сферы развіцця прыдарожнага сэрвісу.

Мікалай Мікалаевіч Рандарэвіч паведаміў, што ТАА “БелРосТоргСбыт” мае намер на тэрыторыі нашага раёна рэалізаваць інвестыцыйны праект: на аўтамагістралі Мінск— мяжа Расійскай Федэрацыі плануецца будаўніцтва буйнога забаўляльна-абслуговага комплексу, у склад якога будуць уваходзіць гасцініца, казіно і кафэ. У будаўніцтва новага аб’екта плануецца ўкласці каля 2 мільёнаў долараў інвестыцый. Тут будзе створана 60 высокааплачваемых рабочых месцаў.

Пасля выступлення М.М.Рандарэвіча, старшыня раённага выканаўчага камітэта Анатоль Іванавіч Лукашоў і расійскі бізнесмен Фарыд Халітавіч Сабітаў падпісалі пратакол аб намерах супрацоўніцтва паміж Дубровенскім райвыканкамам і ТАА “БелРосТоргСбыт”.

Андрэй КВІР